တရားမဝင် မြန်မာ လုပ်သား ဖမ်းဆီးရေး စတင် မဲဆောက်၌ ၆ဝ ဦးကျော် အဖမ်းခံရတရားမဝင် မြန်မာအလုပ် သမားများ ဖမ်းဆီးသည့် စစ်ဆင်ရေးကို ဇူလိုင် ၃၁ ရက်နေ့တွင် ထိုင်း-မြန်မာ နယ်စပ် မဲဆောက်တွင် စတင် လိုက်သည်။
မဲဆောက်မြို့ပြင်ရှိ မဲ့ကဆာ ရွာအမှတ် ၂၆၁ ရပ်ကွက် ၁ဝတွင် တည်ရှိသည့် စိုင်းမွန်းအမှတ်တံဆိပ် ဖိနပ်စက်ရုံကို ဇူလိုင် ၃၁ ရက် မွန်းလွဲပိုင်းက မဲဆောက်အာဏာပိုင် များက ရှောင်တခင် ဝင်ရောက်စစ် ဆေးခဲ့ပြီး တရားမဝင်အလုပ်လုပ် ကိုင်နေသည့် မြန်မာအလုပ်သမား ၆၈ ဦးကို ထိုင်းရဲက ဖမ်းဆီး လိုက်ခြင်း ဖြစ်သည်။
ရှောင်တခင်ဖမ်းဆီးမှုတွင် အဖမ်းခံရသည့် မြန်မာများကို မြန်မာနိုင်ငံ မြဝတီဘက်သို့ နယ်နှင်ဒဏ်ပေးမည်ဖြစ်ပြီး အလုပ်ရှင်ကို ဥပဒေအရ အရေးယူမှုများ ဆောင် ရွက်သွားမည်ဟု ထိုင်းလူဝင်မှုကြီးကြပ်ရေး အရာရှိတစ်ဦးက သတင်း ထောက်များကို ပြောသည်။
အဖမ်းခံရသူများကို မဲဆောက် ရှိ ထိုင်းလဝကအချုပ်တွင် ချုပ်နှောင်ထားပြီး အမျိုးသမီး ၄၈ ဦးနှင့် အမျိုးသား ၂ဝ ဦးဖြစ်ကာ ၄င်းတို့ အမှုအတွက် လိုက်ပါဆောင်ရွက်ပေး မည့် အဖွဲ့အစည်းများ မရှိသေးဟု အလုပ်သမား များက ပြောသည်။ အဆိုပါ ဖမ်းဆီးမှုသတင်း ကြောင့် မဲဆောက်ရှိ စက်ရုံ၊ အလုပ် ရုံများက ၄င်းတို့၏ အလုပ်သမား များကို ခေတ္တတိမ်းရှောင်မှုများ ပြု လုပ်စေပြီး အချို့စက်ရုံများ လုပ်ငန်းလည်ပတ်မှု ရပ်နားထားသည်ဟု မြန်မာအလုပ် သမားအရေး ဆောင် ရွက်နေကြသည့် အဖွဲ့များက ပြောသည်။
မဲဆောက်အပါအဝင် တာ့ခ်ခရိုင်အတွင်း မြန်မာအလုပ်သမား လေးသိန်းခန့် ရှိသည့်အနက် တရားဝင်အလုပ်လုပ်ကိုင်ခွင့် မှတ်ပုံတင်ထားသည့် အရေ အတွက်မှာ လေးသောင်းခန့်သာရှိသည်ဟု ထိုင်းအလုပ်သမားရုံး၏ မှတ်တမ်းများအရ သိရှိရသည်။
မဲဆောက်ရှိ အလုပ်ရုံစက်ရုံများသည် လုပ်အားခဈေးပေါသည့် မြန်မာအလုပ် သမားများကို အဓိကအသုံးပြုနေကြခြင်းဖြစ်ပြီး တစ်နေ့လုပ်အားခကို ထိုင်း ဘတ်ငွေ ၁ဝဝ အောက်သာ ပေးသည်ဟု မြန်မာအလုပ်သမားများက ပြောသည်။
မဲဆောက်အပါအဝင် တာ့ခ်ခရိုင်အတွင်း ထိုင်းအလုပ်သမား ဝန်ကြီးဌာနမှ တရားဝင်သတ်မှတ်ထားသည့် တစ်နေ့တာ လုပ်အားခမှာ ၂၂၆ ဘတ်ဖြစ်ပြီး လက်ရှိ မဲဆောက်မြို့နယ်အတွင်း လုပ်ငန်းခွင်အသီးသီး၌ မြန်မာအလုပ် သမားနှစ်သိန်းခန့် လုပ်ကိုင်လျက်ရှိသည်။
No comments:
Post a Comment